१२ साउन,इनरुवा । सुनसरीको देवानगञ्ज गाउँपालिका–३, कप्तानगञ्जमा भएको घटनापछि हिन्दु–मुस्लिम समुदायबीचको तनाव मंगलबार थप चर्किएको छ। प्रदर्शनकारीहरूले इटहरीको पकलीदेखि कोशी ब्यारेजसम्म पूर्व–पश्चिम राजमार्ग अवरुद्ध गरेका छन् भने सदरमुकाम इनरुवासहित संवेदनशील क्षेत्रमा सुरक्षा व्यवस्था कडा पारिएको छ।
आइतबार राति दुई समुदायबीच भएको झडपका क्रममा प्रहरीको गोली लागेर २४ वर्षीय ओमप्रकाश मेहताको मृत्यु भएको थियो। उक्त घटनाको निष्पक्ष छानबिन, दोषीमाथि कारबाही र पीडित परिवारलाई न्यायको माग गर्दै विभिन्न स्थानमा प्रदर्शन जारी रहेको छ।
स्थिति नियन्त्रणमा लिन जिल्ला प्रशासन कार्यालयले इनरुवा नगरपालिका तथा देवानगञ्ज गाउँपालिकाका केही क्षेत्रमा कर्फ्यु आदेश जारी गरेको छ। कर्फ्यु अवधिमा अत्यावश्यक सेवाबाहेक आवतजावतमा रोक लगाइएको छ भने नेपाल प्रहरी, सशस्त्र प्रहरी र नेपाली सेनासमेत परिचालन गरिएको छ।
यस घटनाको प्रभाव सुनसरीसँगै सिरहालगायत तराईका अन्य जिल्लामा पनि देखिएको छ। केही स्थानमा विरोध प्रदर्शन र राजमार्ग अवरोधका कारण यात्रुहरू अलपत्र परेका छन् भने सवारी आवागमन प्रभावित बनेको छ।
प्रशासनले सर्वसाधारणलाई अफवाहमा विश्वास नगर्न, सामाजिक सञ्जालमा भ्रामक सामग्री नफैलाउन तथा संयमता अपनाउन आग्रह गरेको छ। राजनीतिक दल, नागरिक समाज तथा स्थानीय अगुवाहरूले पनि दुवै समुदायलाई संवादमार्फत समस्या समाधान गर्न अपिल गरेका छन्।
घटनाको थप अनुसन्धान जारी रहेको प्रहरीले जनाएको छ भने सुरक्षा निकायले अवस्था सामान्य बनाउन निरन्तर प्रयास गरिरहेको जनाएको छ।
