३ साउन,काठमाडौँ । बलिउडका ‘सदाबहार तन्दुरुस्त’ अभिनेता एवं करोडौँ युवाका फिटनेस आइकन सलमान खानको एउटा पछिल्लो भिडियोले यतिबेला सामाजिक सञ्जालमा बहस छेडिदिएको छ ।
मुम्बईमा आयोजित एक कार्यक्रममा देखिएका सलमानको शारीरिक अवस्था र हुलिया सोचेभन्दा निकै कमजोर पाइएपछि संसारभरका फ्यानहरू स्तब्ध भएका छन् । भिडियो भाइरल हुनासाथ सामाजिक सञ्जालमा “हाम्रा भाइजानलाई आखिर के भयो, कतै उनी गम्भीर बिरामी त छैनन्?” भन्दै शुभचिन्तकहरूले चिन्ता व्यक्त गर्न थालेका छन् ।
सधैँ आफ्नो कसिलो जीउज्यान र ‘दबङ’ जवानीका लागि चिनिने सलमान भिडियोमा निकै वृद्ध, गलेको र ठीकसँग हिँड्न समेत मुस्किल परिरहेको जस्तो देखिन्छन् । ६० वर्ष पुगेका अभिनेताको अनुहार ओइलाएको र छाला झुण्डिएको प्रष्टै देख्न सकिन्छ।
बडीगार्ड ‘शेरा’ भन्दा पनि वृद्ध देखिए भाइजान
भिडियो सार्वजनिक भएपछि सामाजिक सञ्जालमा कमेन्टको बाढी नै आएको छ। सलमानको यो रूप देखेर एक फ्यानले लेखेका छन्, “भाइजान त आफ्ना व्यक्तिगत बडीगार्ड शेराभन्दा पनि बुढो देखिन थालेछन्, यो दृश्य हेर्नै निकै दुःख लागिरहेको छ ।” त्यस्तै, अर्का प्रयोगकर्ताले उनको स्वास्थ्यमाथि आशंका गर्दै लेखेका छन्, “उनी ठीकसँग खुट्टा टेक्न समेत सकिरहेका छैनन्, कतै उमेरका कारण मात्र हो कि भित्र कुनै लुकेको रोगले यस्तो बनाएको हो?”
बलिउड वृत्तमा यो भिडियोले ठूलो हलचल पैदा गरेको छ । कतिपयले ६० वर्षको उमेरमा यस्तो देखिनु प्राकृतिक भएको तर्क गरे पनि, बहुसंख्यक फ्यानहरू भने उनको खस्कँदो स्वास्थ्यलाई लिएर डराएका छन् । यद्यपि, सलमान खान वा उनको म्यानेजमेन्ट टोलीको तर्फबाट स्वास्थ्यलाई लिएर अहिलेसम्म कुनै आधिकारिक बयान बाहिर आएको छैन ।
कुन कार्यक्रममा देखिएका थिए सलमान?
पछिल्लो समय बिग्रँदो सुरक्षा थ्रेट र अन्य कारणले सञ्चारमाध्यममा कमै देखिने सलमान खान शुक्रबार मुम्बईको ‘स्लम रिह्याबिलिटेसन अथोरिटी’ (SRA) को नयाँ आईटी सर्भर रुम उद्घाटन गर्न पुगेका थिए । उक्त कार्यक्रममा उनले गरिब परिवारहरूलाई नयाँ घरको साँचो समेत हस्तान्तरण गरेका थिए ।
परोपकारी र सामाजिक काममा सक्रिय देखिए पनि, उनको यो अप्रत्याशित हुलिया र शारीरिक कमजोरीले गर्दा यतिबेला उनका करोडौँ प्रशंसकहरूको निन्द्रा हराम गरिदिएको छ । अहिले इन्टरनेटभरि सलमानको सुस्वास्थ्यको कामना गर्नेहरूको ओइरो लागेको छ।
